Камион со приколка скоро една година возен без регистрација, го запреле кај Петровец

На автопатот Скопје-Велес, на наплатна станица Петровец вчера во 10:10 часот, полициски службеници од Мобилната единица за безбедност на сообраќајот на патиштата при Секторот за сообраќајни работи во МВР извршиле контрола на товарно возило – влекач „Мерцедес“ и полуприколка со скопски регистарски ознаки, управувано од М.М. (47) од Скопје, а сопственост на правно лице, соопшти МВР.

„Притоа бил констатиран прекршок по член 344 став 3 од Законот за безбедност на сообраќајот на патиштата, а во врска со член 26/10 од Законот за возила, односно затоа што сообраќајната дозвола на влекачот и полуприколката биле истечени и важеле до 24.04.2024. По целосно документирање на случајот, ќе биде поднесена соодветна пријава“, велат од МВР.

Министерството за внатрешни работи апелира до возачите и сите учесници во сообраќајот да ги почитуваат сообраќајните правила и прописи и сите заедно да придонесеме за побезбедни патишта.