СОЈУЗНИКОТ НА ПУТИН ФРЛИ ОКО НА РУДНИК КАЈ БАМУТ: Кои мотиви стојат зад “опсесијата” за клучниот град во Украина

Официјален претставник на Белата куќа изјави дека блискиот сојузник на рускиот претседател Владимир Путин, Евгениј Пригожин, е заинтересиран да ја преземе контролата врз солта и гипсот од рудникот во близина на Бахмут, Украина.

Имено, Евгениј Пригожин е основач на најмоќната руска платеничка група Вагнер, која одигра клучна улога во руската офанзива на Бахмут, пишува Гардијан.

Како што додава функционерот, постојат одредени индикации дека монетарните мотиви ја поттикнуваат Русија и „опсесијата“ на Пригожин за Бахмут.

Москва се уште не ги коментира овие наводи.

Америка претходно ги обвини руските платеници за искористување на ресурсите во Централноафриканската Република, Мали, Судан и на други места за да помогнат во финансирањето на војната на Москва во Украина, што Русија го негираше и го опиша како „антируски бес“.

Пригожин, во видеото објавено за време на Новата година, е снимен како го посетува подрумот полн со неговите борци кај Бахмут, меѓу кои и многу осуденици, кои беа убиени за време на очајните борби за градот, кој од летото беше клучна руска цел.

Пригожин изјавил дека неговите борци еднаш поминале недели обидувајќи се да освојат само една куќа во Бахмут.

Минатиот месец, украинските трупи кои се борат во областа изјавија за Гардијан дека на источниот град му недостасува некоја очигледна стратешка вредност и се сомневаа зошто Русија е толку фокусирана на она што самиот Пригожин го нарече „Бахмутска мелница за месо“.

„Единствената стратегија што ја гледам во моментов е дека сакаат да го заземат градот за да можат да постигнат некаква победа по година во која имаше толку многу загуби“, рече Саша, член на 24-та механизирана бригада на Украина.

„Во изминатите две недели, забележавме зголемување на гранатирањата и пешадиските напади како да брзаат да го заземат Бахмут. Ова исто така значи дека тие трпат сè поголеми загуби“, рече тој.

Од речиси 50.000 платеници, повеќе од 4.100 наводно биле убиени и 10.000 ранети, вклучително и повеќе од 1.000 убиени помеѓу крајот на ноември и почетокот на декември во близина на Бахмут, објавија САД во четвртокот.

Белата куќа објави кон крајот на минатиот месец дека групата Вагнер ги презела испораките на оружје од Северна Кореја за да помогне во зајакнувањето на руските сили во Украина, што е знак за проширување на улогата на групата во конфликтот. Северна Кореја негираше дека испратила оружје во Москва.