„ИЗНЕНАДЕН СУМ“ Реакција на Бајден на откривањето на доверливи документи во неговата канцеларија

Американскиот претседател Џозеф Бајден објави дека е изненаден кога дознал дека во неговата поранешна канцеларија во вашингтонската невладина организација „Пен Бајден Центар“ се пронајдени доверливи документи и нагласи дека тој и неговиот тим целосно соработуваат во расветлувањето на сите околности во тој случај. 

Зборувајќи пред новинарите на заедничката конференција со лидерите на Мексико и Канада, Бајден вчера најави дека сериозно ги сфаќа доверливите документи и рече дека не знае што содржат.

– Целосно соработуваме во прегледот, кој се надевам дека наскоро ќе биде завршен – рече Бајден.

Адвокатскиот тим на Бајден откри околу десет досиеја во заклучен кабинет во „Пен Бајден Центарот“ во Вашингтон во ноември, и тие беа предадени на Националниот архив.

ФБИ е вклучен во истрага за доверливи документи пронајдени во невладината организација, а од американскиот државен обвинител Мерик Гарланд е побарано да ги разгледа. За време на вчерашното обраќање Бајден се обиде да го оправда ракувањето со документите.

– Пронајдоа некои документи во кутија во заклучен плакар, или барем во плакар. И веднаш сфатија дека во таа кутија има неколку доверливи документи. Тие го направија тоа што требаше да го направат. Веднаш се јавија во архивата – изјави американскиот претседател.

Тој објасни дека бил информиран за ова откритие и дека бил изненаден кога дознал дека во таа канцеларија има владини записи и дека не знаел што има во документите.

Тој рече дека неговите адвокати му предложиле да не прашува што содржат.

Извор запознаен со ова за американската телевизија во понеделникот изјави дека серијата документи не содржи нуклеарни тајни, а не е прецизирано нивото на нивната класификација и доверливост.

Специјалниот советник на Бајден, Ричард Заубер, во понеделникот во изјава за Си-Би-Ес рече дека документите биле откриени непосредно пред конгресните избори од адвокатите на американскиот претседател кои го чистеле канцеларискиот простор.

Бајден, кој беше потпретседател на САД за време на мандатот на Барак Обама од 2009 до 2017 година, потоа до 2020 година имаше канцеларија во организацијата што е на нешто повеќе од еден километар од Белата куќа.

Тој се соочи со критики од републиканците во врска со случајот откако американското Министерство за правда започна истрага минатата година за начинот на кој поранешниот претседател Доналд Трамп постапувал со доверливи документи откриени на неговиот имот Мар-а-Лаго во Палм Бич, Флорида.