Во војска до 30 години! Путин ја поддржува идејата за зголемување на старосната граница за регрутирање

Портпаролот на Кремљ, Дмитриј Песков, изјави дека претседателот на Руската Федерација, Владимир Путин, концептуално ја поддржува идејата за зголемување на старосната граница за регрутирање, но дека деталите за ова прашање треба да ги достави Министерството за одбрана.

„Концептуално, да, таа идеја беше поддржана од шефот на државата, но што се однесува до деталите, формализирањето на оваа идеја, оваа информација мора и треба да се добие од Министерството за одбрана како примарен извор“, рече Песков.

Министерот за одбрана Сергеј Шојгу во декември минатата година предложи старосната граница за регрутирање постепено да се зголемува од 18 на 21 година, како и горната граница да се зголеми на 30 години.

Андреј Картаполов, шеф на Комитетот за одбрана на Државната дума, подоцна објасни дека зголемувањето на возраста ќе биде постепено и ќе трае од една до три години.