Австрија: Нагло пораснаа трошоците за пренамена на родната куќа на Адолф Хитлер

Обемната пренамена на родното место и првиот дом на Адолф Хитлер во град на австриско-германската граница се очекува да чини речиси двојно повеќе од првично планираното, објави вчера австриското министерство.

Празната зграда во Браунау ам Ин ќе ѝ биде ставена на располагање на австриската полиција. Специјална комисија предложи архитектонски промени за да биде речиси непрепознатлив и со тоа помалку привлечен за неонацистите кои прават аџилак на локацијата.

Но цената на градежните работи се искачи на цели 20 милиони евра, 11 милиони повеќе од претходно планираното, соопшти во петокот австриското МВР.

Портпаролот на министерството ова го објасни со „општо зголемување на трошоците за работите“.

Куќата е празна од 2011 година.

Зградата во која се родил нацистичкиот диктатор и каде ги поминал првите месеци од својот живот е празна откако здружението за лица со интелектуална попреченост се исели во 2011 година.

Австриската влада ја одзеде зградата од нејзиниот претходен сопственик по долг спор околу нејзината идна употреба.

Завршувањето на работите се очекува во 2025 година.