ГЕРАСИМОВ ЌЕ ЈА СМЕНИ РУСКАТА ТАКТИКА ВО УКРАИНА: На повидок операции на копно, море, воздух, вселената и сајбер просторот?

Назначувањето на началникот на Генералштабот Валериј Герасимов на позицијата командант на Здружените сили на руската армија може да доведе до промена на руската тактика во зоната на специјални воени операции. Ваквите тактики вклучуваат воени операции не само на копно, туку и во море, воздух, вселена и сајбер простор.

ГЕРАСИМОВ ЌЕ ЈА СМЕНИ РУСКАТА ТАКТИКА ВО УКРАИНА: На повидок операции на копно, море, воздух, вселената и сајбер просторот?

Според мислењето на рускиот експерт Јуриј Кнутов, руската армија ќе се обиде да ја примени токму оваа тактика, која до пролет треба да реши голем број сложени и важни задачи.

Според него, постои цел руската армија до пролет да ја заврши задачата да го ослободи Донбас, ако не целиот, тогаш барем главниот дел.

Мнозинството руски воени аналитичари го гледаа назначувањето на Герасимов како еден вид најава за голема руска офанзива. Воениот и политички коментатор Константин Сивков вели дека именувањето на генералот Герасимов на нова функција навестува дека „треба да се очекува интензивирање на воените операции“ во Украина, додека Игор Коротченко, главен уредник на списанието „Национална одбрана“ објаснува дека „Назначувањето на началникот на Генералштабот на функцијата командант на Обединетите сили на руската армија значи дека сега сите ресурси на вооружените сили на Русија можат да се искористат за да се постигне успех во специјална воена операција“.

„Прво, тоа подразбира повисок степен на координација и меѓуресорска соработка на сите, без исклучок, сили и средства вклучени во специјална воена операција, а таму не се само единиците на Министерството за одбрана, туку и другите безбедносни сили. „Сега сета моќ и контрола на сите сили и ресурси се концентрирани во рацете на Герасимов без исклучок“, посочува Коротченко.

Тоа подразбира зголемување на ефикасноста во одлучувањето, подобра оперативност, команда и контролна комуникација, додаде експертот.

„Уште еднаш повторувам, ова предвидува можност за користење на целиот апарат на Генералштабот, сите поголеми одделенија, центри и структури за постигнување успех во специјална воена операција. Со други зборови, станува збор за нов квалитет и нови можности, кои, како што очекуваме, ќе дадат позитивен резултат. Што се однесува до промената на тактиката, стратегиите на дејствување се диктирани од специфични околности. Затоа, во секој развој на ситуацијата, ќе се утврди најоптималната форма, методите на војување и соодветните операции“, рече Коротченко.

Началникот на Генералштабот има најголем опсег на овластувања

Одлуката за назначување на Герасимов дојде само три месеци откако Министерството за одбрана го назначи генералот Сергеј Суровикин, командант на руските воздухопловни сили, да раководи со операциите во Украина.

За негов заменик беше назначен Суровикин, кој го нарекуваат и „Генерал Армагедон“, заедно со командантот на копнените сили на руската армија, армискиот генерал Олег Саљуков и заменик-началникот на Генералштабот, генерал полковник Алексеј Ким.

Сепак, воените експерти посочуваат дека авторитетот на Суровикин како командант на руските сили во Украина не го покривал целиот опсег на задачи неопходни за успешно извршување на операцијата и има многу прашања кои треба брзо да се решат, од вооружување и опремување на војниците до евакуација на повредените. Началникот на Генералштабот го има целиот опсег на овластувања и не му се потребни дополнителни одобренија за донесување оперативни одлуки, објаснуваат експертите.

Покрај тоа, началникот на Генералштабот секогаш има ажурирани информации за сите аспекти од работењето на вооружените сили, што ќе помогне да се избегне бирократија.

Потребата да се подигне нивото на оперативна команда е поврзана со зголемениот опсег на борбени задачи и потребата од поблиска координација меѓу различните служби и гранки на вооружените сили, соопшти руското Министерство за одбрана. Овој потег, исто така, ќе ја подобри логистичката поддршка и командната ефективност за руските сили во Украина.

„Веќе реков дека руската армија треба да очекува успех на бојното поле. Во однос на специфичните методи на планирање, операциите и борбените формати, гледаме подготовки за почеток на големи испораки на тешко оружје, особено главни борбени тенкови, во голем број западни земји. Затоа ќе ги развиеме оние формати кои нема да дозволат Украина да добие предност поради овие нови пакети западно оружје“, вели Коротченко.

Од Герасимов учел и врховниот командант на украинската армија

Генерал Герасимов има 67 години, а на чело на Генералштабот на РФ е цела деценија. Тој е познат како еден од највисоките руски воени команданти и врвни стратези, кој на Запад го нарекуваат главен идеолог на „хибридната војна“.

Станува збор за стратег за кој се тврди дека е автор на „доктрината на Герасимов“, која подразбира комбинирање на воени, технолошки, информативни, дипломатски, економски, културни и други тактики за да се постигнат стратешките цели.