Поголем дел од унгарските граѓани се против санкциите на ЕУ

Речиси сите унгарски граѓани (97 отсто) кои учествуваа на националните консултации се изјаснија против санкциите на Европската унија воведени кон Русија, изјави портпаролката на унгарската влада Александра Сенткираљи.

„Резултатите од консултациите се објавени: 97 отсто од Унгарците се против санкциите кои можат да предизвикаат сериозна штета“, објави таа на Фејсбук.

На иницијатива на унгарскиот премиер Виктор Орбан, Будимпешта започна национални консултации за да дознае што мислат граѓаните за санкциите на ЕУ против Русија.

Унгарија е првата земја во Европа што започна национално истражување на јавното мислење за воведувањето санкции на ЕУ кон Русија, со цел „да се стави крај“ на растот на цените на енергијата предизвикани од мерките на Брисел.

Орбан постојано истакнуваше дека на економски план Европа загубила најмногу поради руско-украинската војна и дека санкциите наметнати на Руската Федерација не даваат резултати.