Се очекува забрзано ширење на „кракен“: Експертите објавија кој е во ризичната група и нови препораки за заштита

Европскиот центар за превенција и контрола на болести (ECDC) објави дека најновата подваријанта на коронавирусот кој брзо се шири не претставува голем ризик за повеќето луѓе во Европа.

Експертите предупредија дека ранливите групи, како што се постарите, невакцинираните или оние со компромитиран имунолошки систем, се со умерен до висок ризик од новата омикронска подваријанта XBB.1.5 наречена „кракен“.

Сепак, тие истакнаа дека ризикот за општата популација во Европската економска област се чини дека е низок.

Има многу дилеми во врска со подваријантата XBB.1.5 и оваа проценка може да се промени во наредните недели, бидејќи ќе станат достапни повеќе докази.

Кога ќе пристигне во Европа?

Подваријантата XBB.1.5 на омикронската варијанта на коронавирусот многу брзо се шири во САД, но сè уште е релативно ретка во Европа. ECDC очекува брзо проширување.

Математичките модели сугерираат дека подваријантата XBB.1.5 би можела да стане доминантна во Европа за месец или два.

Институтот Роберт Кох, германската агенција за контрола и превенција на болести, објави дека XBB.1.5 е потврден само во 1% од примероците од заразени лица анализирани во лабораторија.

Нови препораки на СЗО за изолација на заразените со Ковид

Светската здравствена организација (СЗО) во петокот го скрати препорачаниот период на изолација за заразените со Ковид на 10 дена за оние со симптоми и пет дена за оние без.

Досега препораката беше 13 дена изолација за лицата со симптоми и 10 дена за оние без симптоми. Исто така, сега препорачува брзи антигенски тестови за заразените луѓе за да видат дали инфекцијата се исчистила и потенцијално да ја скрати нивната изолација.

СЗО ги базира своите препораки на 12 студии со речиси 3.000 учесници. Сепак, ова се само препораки и секоја земја може да објави свои упатства.