Финансиска поддршка за новороденчињата од општина Кисела Вода

Општина Кисела Вода денес додели ваучери во вредност од 12.000 денари за новороденчињата, како финансиска поддршка за семејствата во првите месеци по раѓањето на детето. Настанот беше посветен на најмладите жители и нивните родители.

Градоначалничката Бети Стаменкоска Трајкоска порача дека грижата за децата и семејствата започнува уште од првиот ден. Таа истакна дека исплатата е извршена и за новороденчињата од претходните месеци, за кои средствата беа одложени поради изборниот процес.

„Сакам да ги информирам и сите родители со новороденчиња кои аплицирале во изминатите месеци, а за кои, поради изборниот процес не беше можна исплатата, дека средствата ќе ги имаат на нивните сметки во текот на утрешниот ден“, истакна Стаменкоска Трајкоска, повикувајќи ги сите нови родители да аплицираат за мерката.

Право на аплицирање имаат семејствата со новороденчиња до 90 дена, а потребната документација едноставна за пополнување е достапна на веб-страницата на Општина Кисела Вода.