Герасимовски: 42. Маџирмаалски средби – традиција што го чува духот на Маџир Маало

Општина Центар и годинава е покровител на Маџирмаалските средби, манифестација што повеќе од четири децении го негува маалскиот дух, спортот и културната традиција на едно од најстарите скопски маала.

На средбите се приклучи и градоначалникот на Општина Центар Горан Герасимовски, кој помина прекрасен ден во дружење со маџирмаалци и активно учествуваше во спортските и забавни содржини. Тој истакна дека Маџир Маало е пример за традиција што се одржува и се пренесува со години.

„Маџир Маало има своја енергија и карактер, надалеку прочуени. Овие средби се доказ дека автентичниот маалски дух му пркоси на времето. Секогаш е задоволство и чест да се биде со маџирмаалци. Општина Центар и понатаму ќе ги поддржува ваквите настани, кои се важен дел од локалната традиција”, рече Герасимовски.

На спортските терени во Маџир Маало, на Кејот на Вардар се одржа богата спортско-културна програма со ревијални фудбалски натпревари, како и традиционалниот турнир во „фанта”.

На фудбалскиот натпревар помеѓу екипите на Општина Центар и Град Скопје, заслужено победи екипата на Центар, во фер и спортска атмосфера.
Настанот заврши со заедничко дружење и доделување признанија и благодарници.

Општина Центар 42 години по ред е покровител на Маџирмаалските средби.