Русија е спремна да испрати војници на границата на Ерменија и Азербејџан

Американскиот државен секретар Ентони Блинкен разговарал со ерменскиот премиер Никол Пашинјан за чекорите кои се потребни за повторно да почнат билатералните разговори со Азербејџан, соопшти американскиот Стејт департмент.

Лавров кажа дека Русија и понатаму е спремна да испрати мировна мисија во рамки на Организацијата на договорот за заедничка безбедност (ЦСТО), воениот сојуз кој го предводи Москва, чија членка е Ерменија, но не и Азербејџан. Пречка е инсистирањето на Ереван да се изнуди осуда за однесувањето на Азербејџан.

„Имавме тешкотии поврзани со ситуацијата во Ерменија, кога нашите ерменски пријатели инсистираа да се испрати мисија на ЦСТО на границата со Азербејџан за таму да се гарантира одредена безбедност“, кажа Лавров.

„Се договоривме за документот и параметрите на мисијата, но не можеше да се усвои бидејќи Ерменија почна да инсистира во документот да се вклучи остра осуда на Азербејџан“, кажа шефот на руската дипломатија. Русија е сојузник на Ерменија, но тежнее и кон добри односи со Азербејџан.

Најновите тензии се резултат на блокадата на коридорот Лачин, кој ја поврзува Ерменија со Нагорно Карабах, меѓународно признат како дел од Азербејџан, но во кој живеат главно Ерменци.

Азербејџанци кои се нарекуваат еколошки активисти го блокираа патот повеќе од еден месец тврдејќи дека протестираа против нелегален ерменски рудник. Ереван тврди дека се провокатори поддржани од азербејџанската влада.

„И покрај тоа што сме сојузници, Ерменија повеќе сака да преговара со Европската Унија“, порача Лавров на прес-конференција во Москва. Кажа дека какво било присуство на ЕУ во регионот без согласност од Баку би било контрапродуктивно.