Шеј сруши рекорд на Чемберлен стар 63 години

Шеј Гилџес-Александер влезе во историјата на НБА во ноќта помеѓу петокот и саботата.

Во победата на Оклахома Сити Тандер над Бостон Селтикс со 104:102, канадскиот кошаркар постигна 35 поени и со тоа го одигра 127-от натпревар по ред во кој постигна најмалку 20 поени. Тој го сруши 63 години стариот рекорд на легендарниот Вилт Чемберлен.

Шеј, кој беше и водечки стрелец на натпреварот, го обезбеди рекордот со тројка на почетокот на третата четвртина. Неговата серија започна на 1 ноември 2024 година, кога постигна 30 поени во победата од 137:114 над Портланд Треил Блејзерс.

Вилт Чемберлен го постави претходниот рекорд од 126 последователни натпревари уште во 1963 година.

Легендарниот центар ја држи и следната најдолга серија од 92 натпревари, која започна една година подоцна. Зад нив е легендарниот плејмејкер Оскар Робертсон со 79 последователни 20+ натпревари во сезоната 1963-64.

Најблиску до овој подвиг во модерната ера беше Кевин Дурант, кој имаше 72 последователни натпревари со 20 или повеќе поени во сезоната 2015/16.

Пред да го сруши рекордот на Чемберлен, Шеј Гилџес-Александер го нарече четирикратниот МВП „митско суштество“, признавајќи дека не знае многу за него.