Авиобилетите скокаат ова лето: цените растат за 30 до 90 евра низ Европа

Летувањето во Европа оваа година би можело значително да поскапи, откако авиокомпаниите најавуваат нов бран на зголемување на цените на билетите, кои според проценките може да бидат повисоки за 30 до дури 90 евра по карта.

Главната причина за ова поскапување е драматичниот раст на цените на авионското гориво, кое претставува еден од најголемите трошоци во авиоиндустријата. Според анализите, цената на керозинот е значително зголемена како последица на геополитичките тензии и конфликтите на Блискиот Исток, што директно ги зголемува оперативните трошоци на авиокомпаниите.

Дополнително, во последните недели цената на горивото достигнала нивоа од 150 до 200 долари по барел, што ги принудува авиокомпаниите да воведуваат дополнителни такси или директно да ги зголемуваат цените на билетите.

Европските авиопревозници веќе предупредуваат дека не можат долго да ги апсорбираат овие трошоци и дека тие неизбежно ќе се префрлат на патниците. Според нив, заштитните договори за гориво (хеџинг) постепено истекуваат, што дополнително ќе влијае врз цените во наредните месеци.

Покрај горивото, на цената на билетите влијаат и други фактори – зголемени даноци, ограничен капацитет на летови и растечка побарувачка за патувања во летниот период. Дел од авиокомпаниите веќе најавуваат намалување на бројот на летови на одредени линии поради неисплатливост, што дополнително може да ги зголеми цените поради помала понуда.

Експертите советуваат патниците да ги резервираат билетите што е можно порано, бидејќи цените имаат тенденција да растат како што се приближува сезоната. Во спротивно, летувањето оваа година може да стане значително поскапo, особено за популарните европски дестинации.

Заклучокот е јасен – евтините авионски билети полека стануваат минато, а летото 2026 година може да донесе сериозен удар врз буџетите на туристите, со поскапувања што ќе се чувствуваат кај речиси сите европски линии.