Капело: Два големи проблеми треба да реши Англија пред СП

Поранешниот селектор на Англија, Фабио Капело (79), смета дека Томас Тухел (52), пред Светското првенство, мора да се справи со навиката на националниот тим да игра со страв. Италијанскиот стручњак, кој ја водеше Англија од 2007 до 2012 година, истакна два клучни проблеми со кои се соочува новиот селектор на патот кон можен успех, пишува „Дејли меил“.

Капело ги предводеше „Трите лава“ на Светското првенство во 2010 година во Јужна Африка, каде што беа елиминирани во осминафиналето од Германија по поништениот гол на Френк Лампард.

И покрај тоа што Англија стигна до полуфиналето во 2018 година и до четвртфиналето во 2022 година под водство на претходникот на Тухел, Гарет Саутгејт, Капело верува дека фундаменталните проблеми остануваат.

„Тоа е проблем на Англија. Играчите се уморни и исплашени“, изјави Капело за „Би-Би-Си“. „Селекторот мора да ги реши тие две работи“.

Англија играше во две финалиња на Европско првенство под водство на Саутгејт. На ЕП во 2024, тие загубија од Шпанија со 2:1 во Берлин, додека на ЕП во 2020, беа поразени на „Вембли“ од Италија по изведувањето на пенали.

Капело се осврна на тој пораз во Лондон, истакнувајќи ја нелагодноста како главна причина за неуспехот.

„Се сеќавам на тој натпревар против Италија“, рече Капело. „Тие поведоа по 10-15 минути, а потоа престанаа. Престанаа да играат. Играа со страв.“

Тој страв е мотив што се провлекува низ историјата на англискиот фудбал уште од единствениот голем трофеј освоен во 1966 година. По неодамнешните порази во пријателските натпревари против Уругвај и Јапонија, повторно се постави прашањето дали дресот на репрезентацијата стана претежок товар за играчите. Дефанзивецот Марк Гуехи исто така го призна ова по поразот од Јапонија на Вембли.

„Не е лесно да се носи овој дрес. Играте против тимови кои се добро организирани и дисциплинирани“, изјави Гуехи за„ИТВ“.

„Тие исто така се квалификуваа за Светското првенство и сакаат да се докажат. Важно е да останеме обединети, да учиме од ова и да продолжиме понатаму“, додаде англискиот дефанзивец.

Светското првенство во САД, Канада и Мексико започнува на 11 јуни, а Англија го игра својот прв натпревар од групата една недела подоцна против Хрватска.

Foto/ Depositphotos