АПОКАЛИПТИЧНИ НАЈАВИ – Рускиот патријарх Кирил: Поразот на Русија во Украина би значел крај на човештвото

Поглаварот на Руската православна црква, патријархот Кирил предупреди дека секој обид за уништување на Русија ќе значи и крај на светот.

„Денес има големи закани за светот, за нашата земја и за целото човештво“, рекол патријархот Кирил

„Желбата да се победи Русија денес доби многу опасни форми. Му се молиме на Господ да ги вразуми и да им помогне да разберат дека секоја желба да се уништи Русија ќе значи крај на светот“, додаде патријархот Кирил.

Тој рече дека Русија има моќно оружје и луѓе со силна желба секогаш да победуваат.
„Денес е толку вознемирено време, но ние веруваме дека Господ нема да ја напушти руската земја, дека Русија ќе има сила да ја заштити својата земја и својот народ“, рече Кирил.

Руската православна црква и самиот патријарх Кирил отворено застанаа на страната на режимот на Путин и силно ја поддржаа руската агресија врз Украина. Многу верски водачи, вклучително и папата Франциско, го осудија патријархот Кирил за поддршката на војната.