Лекар откри кој трик против полен навистина помага: „Ова е најефикасното решение за алергиите“

Сезоната на полен повторно им создава сериозни проблеми на милиони луѓе ширум Европа. Кивање, насолзени очи, затнат нос, чешање и проблеми со дишењето стануваат секојдневие за лицата кои страдаат од алергиски ринитис, познат и како поленска треска. Експертите предупредуваат дека климатските промени дополнително ја влошуваат состојбата, бидејќи сезоната на полен трае сè подолго, а концентрациите во воздухот се сè поголеми.

Поради глобалното затоплување, растенијата цветаат порано и подолго од порано, а зголеменото количество јаглерод диоксид во атмосферата предизвикува создавање уште поголеми количини полен. Дополнителен проблем е што поленот станува посилен и поагресивен, па дури и мали количества можат да предизвикаат силни реакции кај алергичарите.

Според проценките на експертите, во следните десет години дури половина од населението во Европа би можело да има некаков вид алергија. Нелекуваниот алергиски ринитис може да доведе и до посериозни здравствени проблеми, вклучувајќи развој на астма.

Во обид да пронајдат решение, многу луѓе користат разни домашни трикови – од ставање вазелин околу носот до прочистувачи на воздух и специјални очила. Но, фармацевтот Амир Синг, регистриран во Велика Британија, решил да ги тестира најпопуларните методи и да открие кои навистина функционираат.

Еден од најпознатите трикови е нанесување вазелин околу ноздрите за поленот да се „залепи“ пред да влезе во носот. Синг оваа метода ја оценил со пет од десет, објаснувајќи дека може делумно да помогне, но предупредил дека пушачите треба да бидат внимателни бидејќи комбинацијата на вазелин и цигара може да претставува ризик од запалување.

Средна оценка добило и туширањето по враќање дома. Идејата е поленот да се измие од кожата, косата и облеката за да не се шири низ домот. Иако ова може делумно да ги намали симптомите, фармацевтот смета дека не е доволно ефикасно кај луѓе со посилни алергии.

Изненадувачки, прочистувачите на воздух поминале многу лошо. Синг им дал само три од десет, сметајќи дека нивниот ефект во борбата против поленската треска е многу помал од тоа што луѓето очекуваат.

Како убедливо најдобар метод фармацевтот го издвоил испирањето на носот со физиолошки или солен раствор. Оваа метода добила максимални десет од десет.

Станува збор за едноставен процес со кој механички се отстрануваат поленот, прашината и другите алергени од носните канали. На тој начин се намалува воспалението на слузницата, се олеснува дишењето и се намалува затнатоста на носот.

Експертите нагласуваат дека овој метод не само што веднаш ги ублажува симптомите, туку може да ја намали и потребата од лекови против алергија.

Фармацевтот се осврнал и на честата дилема дали поскапите антихистаминици се подобри од поевтините. Неговиот одговор бил директен.

„Заштедете пари. Скапите таблети против алергија не се ништо поефикасни. Сите делуваат слично“, објаснил Синг.

Според лекарите, сезоната на алергии најчесто започнува кон крајот на март со поленот од дрвјата, продолжува со тревите од мај до јули, а потоа проблем создава поленот од коровите сè до септември.

Стручњаците советуваат граѓаните редовно да ги следат поленските прогнози, да избегнуваат подолг престој надвор во денови со висока концентрација на полен и по потреба да користат едноставни и безбедни методи како испирање на носот со солен раствор, кое сè повеќе се покажува како едно од најефикасните решенија во секојдневната борба против алергиите.