Германците тестираа „екстра девствени“ маслинови масла: Дел не ги исполнија ниту основните стандарди

Големо тестирање на квалитетот на маслиновите масла во Германија откри сериозни проблеми кај дел од производите што се продаваат како „екстра девствено маслиново масло“. Анализата опфатила 30 различни масла, меѓу кои конвенционални и органски производи, а резултатите изненадиле и експерти и потрошувачи.

Само две масла успеале да ја добијат највисоката оцена „многу добро“. Најдобро рангирани биле екстра девственото маслиново масло „Рапунзел“ од Италија и органското маслиново масло на „Алди“, кое особено ги изненадило експертите поради добриот однос меѓу цената и квалитетот.

Маслиновото масло „К-Класик“ од „Кауфланд“ добило оцена „добро“, но анализите покажале присуство на траги од два пестицида.

Од друга страна, дури седум масла не ги исполниле стандардите потребни за ознаката „екстра девствено“ и добиле оцена „недоволно“. Особено внимание предизвикал фактот што шест од тие производи биле органски масла, што дополнително ги изненадило стручњаците.

Експертите кај дел од маслата откриле сериозни недостатоци во вкусот и мирисот. Некои имале ужегнат вкус и непријатен мирис, додека кај други бил забележан таканаречен „каллив“ вкус, кој најчесто се појавува кога маслинките почнуваат да ферментираат пред обработката.

Според стручњаците, ваквите недостатоци укажуваат на проблеми при складирањето или преработката на маслинките, што директно влијае врз квалитетот на финалниот производ.

Анализите покажале и дека остатоци од пестициди биле пронајдени во речиси сите конвенционални масла, но и во дел од органските производи.

Најлош резултат имало маслото „Беласан“ од „Алди“, во кое биле откриени дури шест различни пестициди. Посебна загриженост предизвикало присуството на фунгицидите дифеноконазол и тебуконазол, за кои постојат сомнежи дека би можеле да бидат поврзани со канцерогени ефекти и негативно влијание врз репродуктивното здравје.

Еден од најзагрижувачките резултати се однесува на минералните масла. Траги од овие соединенија биле пронајдени во сите 30 анализирани производи.

Стручњаците објаснуваат дека минералните масла можат да навлезат во производот за време на производството, обработката или транспортот, а одредени видови од овие соединенија се сметаат за потенцијално штетни за ДНК и можни канцерогени материи.

Дополнителен проблем бил откриен во пет органски масла, каде што бил пронајден дибутил фталат (ДБП), хемикалија што се користи во пластика. Станува збор за соединение кое може да делува како хормон и потенцијално негативно да влијае врз плодноста.

Иако ова соединение е забрането во Европската Унија за материјали што доаѓаат во контакт со масла за јадење, експертите предупредуваат дека може да навлезе во производот преку цевки, заптивки или друга опрема што се користи во производствениот процес.

По објавувањето на резултатите, експертите дадоа и практични совети за потрошувачите. Препорачуваат маслиновото масло да се купува на почетокот на годината, кога на пазарот пристигнуваат свежите масла од новата берба, бидејќи тогаш имаат најдобра арома и квалитет.

Советуваат маслото дома да се чува на темно место, добро затворено и на температура пониска од 15 степени Целзиусови. Сепак, предупредуваат дека не е препорачливо да се чува во фрижидер, бидејќи ниските температури можат негативно да влијаат на аромата и вкупниот квалитет на маслиновото масло.