Дали постојано заборавате? Јапонска техника ги намалува грешките за дури 85 отсто

Секому му се случило барем еднаш – да излезе од дома и неколку минути подоцна да се запраша дали ја исклучил пеглата, шпоретот или заклучил врата. Ваквите сомнежи се дел од секојдневието на многу луѓе, но постои едноставна техника која може значително да помогне во подобрување на вниманието и памтењето.

Во Јапонија, железничките оператори со години користат посебен систем за спречување човечки грешки наречен „шиса канко“, што во превод значи „покажување и изговарање“. Оваа метода е развиена како дел од безбедносните процедури во јапонскиот железнички систем и има за цел да ја подобри концентрацијата и точноста при извршување задачи.

Според лиценцираната терапевтка Џој Галон, принципот е многу едноставен. Лицето се фокусира на одреден предмет или задача, покажува кон неа и гласно ја именува или потврдува активноста.

На пример, наместо само механички да ја исклучите рерната, можете да покажете кон неа и да кажете: „Рерната е исклучена“. На овој начин, во процесот истовремено се вклучуваат повеќе сетила – видот, движењето, говорот и слухот.

Истражување на Јапонскиот институт за технички истражувања на железницата покажало дека примената на техниката „шиса канко“ може да ги намали човечките грешки за дури 85 проценти.

Експертите објаснуваат дека методата активно го ангажира мозокот, наместо задачите да се извршуваат автоматски и без свесно внимание.

Дополнително, оваа техника може да биде особено корисна за лица со нарушување на вниманието и хиперактивност (АДХД). Според терапевтот Били Робертс, мозокот кај лицата со АДХД подобро функционира кога е стимулиран преку повеќе различни канали истовремено.

„Кога мозокот добива повеќе форми на стимулација, добива и подобра регулација. Повторувањето на информациите може да помогне полесно да се запаметат“, објаснува Робертс.

Психотерапевтката и консултантка за АДХД, Тери Матлен, исто така забележала дека некои нејзини клиенти користат музика за подобро памтење. Наместо обично потсетување, тие пеат кратки фрази со позната мелодија за полесно да ги запомнат задачите.

Според експертите, токму ваквите едноставни техники можат значително да помогнат во намалување на секојдневните пропусти, подобрување на концентрацијата и создавање подобри навики.