Климатските промени ја забавуваат ротацијата на Земјата – деновите постепено стануваат подолги

Нова научна студија открива дека климатските промени веќе влијаат и врз самата ротација на Земјата, при што деновите постепено стануваат подолги поради топењето на поларните ледени покривки и глечерите.

Иако промената се мери во делови од милисекунда и е незабележлива во секојдневниот живот, научниците предупредуваат дека процесот е без преседан во последните 3,6 милиони години од геолошката историја на планетата.

Според истражувањето, топењето на мразот предизвикува огромни количини вода да се прераспределуваат од половите кон океаните и екваторот. Ова ја менува распределбата на масата на Земјата и ја успорува нејзината ротација.

Научниците го споредуваат процесот со лизгачка која при вртење ги испружува рацете – кога масата се оддалечува од центарот, движењето се забавува.

Истражувањето го спровеле експерти од Универзитетот во Виена и ETH Цирих, кои анализирале дали вакви промени постоеле и во далечното минато.

За да дојдат до заклучоците, тие проучувале фосилизирани остатоци од едноклеточни морски организми познати како бентосни фораминифери. Нивните лушпи содржат информации за древните промени на нивото на морето и движењето на Земјата.

Со користење алгоритми за машинско учење, истражувачите реконструирале промени во ротацијата на Земјата во период од 3,6 милиони години, а современиот период се издвоил како еден од најекстремните.

Според научниците, денес должината на денот се продолжува за околу 1,33 милисекунди на секои сто години поради климатските промени.

Иако тоа изгледа како минимална промена, експертите објаснуваат дека зад неа стојат огромни прераспределби на маса на планетарно ниво.

Тие проценуваат дека околу 1.000 гигатони маса се префрлаат од половите кон океаните, создавајќи енергија доволна за да влијае врз ротацијата на Земјата.

Научниците предупредуваат дека доколку продолжат високите емисии на стакленички гасови, климатските промени до крајот на векот би можеле да станат еден од главните фактори што ја менуваат должината на денот, заедно со гравитациското влијание на Месечината.

Иако луѓето директно нема да ја почувствуваат оваа промена, таа е исклучително важна за модерните технологии како GPS навигацијата, сателитските системи и прецизните мерења на времето.