(Фото) Музичари, уметници и љубители на музиката се собраа денес да протестираат во одбрана на МКЦ

Голем број граѓани денес излегоа пред Младинскиот културен центар да протестираат во одбрана на МКЦ. На собирот имаше голем број музичари, уметници и љубители на музиката кои изразија незадоволство од начинот на кој се раководи со оваа институција.

Собирот го организираше колективот на млади музичари „Гола планина“ и на него настапија голем број пејачи. Раперот Никола Трпески „С.А.М.“ и музичарот Мартин Џорлев, кој е дел од „Гола планина“, рекоа дека досега во МКЦ имале голем број свирки и дека тоа мора да продолжи и во иднина.

Имаше луѓе кои дојдоа со пароли на кои пишуваше „МКЦ не е партиска цицка“ и „Културата е скапа, некултурата поскапа“. За потсетување, протестот беше најавен по смената на досегашниот в.д. директор Ванчо Богоев, а на него се собираа и потписи за зголемување на буџетот.

Организаторите велат дека буџетот на МКЦ е само 8 отсто од годишниот буџет со кој се работело и во изминатите години или само 32.000 евра. Петицијата ќе ја испратат и до Град Скопје и Министерството за култура, но засега велат дека сакаат само да соберат што повеќе потписи.

Фото: Фејсбук