Бугарското МНР со нота ќе бара да им се обезбеди пристап на Бугарите на гробот на Гоце Делчев на 4-ти февруари
Бугарија ќе бара со нота да им се обезбеди пристап на Бугарите што патуваат во Северна Македонија за да се поклонат на споменикот на Гоце Делчев на 4 февруари. На настанот ќе учествуваат и претставници на бугарската амбасада.
Ова го соопшти бугарскиот министер за надворешни работи, Николај Милков, на брифинг на кој извести за сработеното на МНР за време на мандатот на преодната влада, извести „БНТ.бг“.
-На социјалните мрежи во Северна Македонија се организираат блокади на патот кон Скопје против бугарските неонацисти. Клучно е да се обезбеди безбедност на Бугарите таму. Обезбедувањето непречено оддавање почит на 4 февруари е елемент на тоа. Сакаме да постигнеме деескалација. Ние не бегаме од таков дијалог. Нашиот премиер ќе има телефонски разговор со македонскиот премиер Ковачевски, а еден од главните елементи ќе биде обезбедувањето на безбедноста на бугарските граѓани воопшто, како и за тоа што ќе се случи на 4 февруари. Ние се залагаме за таква деескалација, не треба да се вратиме на ситуацијата пред една недела бидејќи тоа би било конкретизирање на репресијата, посочи Милков.
Според бугарскиот шеф на дипломатијата, доколку Северна Македонија го попречи пристапот на бугарските граѓани, тоа би било без преседан.
„Ако тоа се случи, тоа ќе биде без преседан. Немам информации дека две земји членки ги прогласиле своите граѓани за персона нон грата. Ова ќе биде без преседан и ќе бара одговор без преседан. Андреј Ковачев е известувач за РСМ во ЕП“, потсети тој.
Обвини дека Бугарите и луѓето со бугарска самосвест немале доверба во македонските институции, а поплаките што ги поднесуваат не се разгледуваат или ако се разгледаат, добиваат негативен резултат.
Инаку, народот се самоорганизира да спречи пристап на Бугари и организирани бугарски групи до гробот на Гоце Делчев. Иницијативата за ноќна стража на гробот на Гоце Делчев се шири низ цела Македонија.
Бугарски граѓани на 4 февруари организирано ќе дојдат во Скопје за да се поклонат пред гробот на Гоце Делчев.
На социјалните мрежи пак, е објавен повик граѓаните тој ден да ја блокираат патарината Куманово- Скопје со цел нивно спречување.
-Повик до сите родољуби! Дојдете со камиони, трактори, автомобили и друга машинерија и поддржете го протестот. Кумановчани – ве повикуваме во 9 часот да ја блокирате патарината кон Скопје. Да не дозволуваме бугарските нео-нацисти да плукаат по споменот на великанот Гоце Делчев, стои во објавата.
