ЗЕЛЕНСКИ ГИ ИЗНЕНАДИ: СО СПИСОЦИ ПОБАРА ТОЧНО ТОА ШТО ГО ИМААТ НА ЗАЛИХИТЕ. ЗНАЕ ДО ДЕТАЛ

– Европската унија ќе стои покрај Украина со цврста поддршка онолку долго колку што е потребно, се вели во соопштението усвоено денеска на самитот во Брисел.

– Руската брутална војна, која трае речиси цела година, донесе огромно страдање и уништување на Украина и нејзиниот народ. Русија мора веднаш да ја прекине оваа ѕверска војна, стои во документот.

Исто така, се вели дека ќе се направат обиди да се зголеми „колективниот притисок“ против Русија во тесна координација и соработка со партнерите. Ќе се засилат и мерките против заобиколување на санкциите.

Сепак, лидерите беа порезервирани да дадат повеќе оружје како борбени авиони и покрај молбата на Зеленски дека „нема право да се врати дома без резултати“, јави ДПА.

Зеленски беше гостин на самитот – тоа беше неговото второ патување во странство од почетокот на војната – и на секој лидер му даде список на материјали што ѝ се потребни на Украина за да се бори против Русија, според официјален претставник на ЕУ.

– Украинскиот тим подобро знае што има на залиха секоја земја-членка отколку самите лидери. Затоа е неверојатно колку добро се организирани да ја водат оваа војна, рекол претставникот на ЕУ.

Украинскиот претседател очекувања да добие авион, но францускиот претседател Емануел Макрон предупреди дека таков потег „дефинитивно нема да се случи во наредните недели“.

Словачката влада беше попозитивна во врска со постојаното украинско барање за воени авиони. Зеленски директно побарал од соседната земја борбени авиони од советскиот тип МиГ-29.

Словачкиот премиер Едуард Хегер му ветил на Зеленски дека „ќе работи на исполнување на оваа желба“, се вели во снимката од краткиот разговор меѓу двајцата политичари објавена од владината канцеларија во Братислава.

Хегер за словачката новинска агенција ТАСР изјави дека конкретната процедура за предавање на борбените авиони ќе биде разјаснета не само во рамките на Словачка, туку и на европско ниво, бидејќи Словачка ќе ги предаде МиГ-29 на Украина согласно механизмот за финансирање на ЕУ.

Португалија во меѓувреме и вети на Украина три тенкови Леопард 2А6, изјави премиерот на земјата Антонио Коста на самитот, јави португалската новинска агенција Луса.

Макрон не ја отфрли можноста за испраќање авиони, но рече дека барањата за обука, меѓу другото, значат дека тоа ќе потрае подолго.

Францускиот претседател рече дека борбените авиони не се она што и треба на Украина во моментов во војната против Русија. Поважна, на пример, е дополнителна артилерија, рече тој.

За да помогне во снабдувањето на Украина со артилериска муниција, естонската премиерка Каја Калас го претстави планот за подобрување на набавката на оружје и залихите на ЕУ.

Како „мотор“ за зајакнување на одбранбената индустрија, Калас сака Европската комисија да користи средства од земјите-членки на ЕУ за купување оружје слично на начинот на кој комисијата набавува вакцини за Ковид-19.

Внимателноста околу авионите и резервите на оружје се прошири и на прашања како што е употребата на замрзнати руски средства што се користат за обнова на Украина.

ЕУ и нејзините партнери ќе ја „засилат својата работа“ по ова прашање, во согласност со ЕУ и меѓународните закони, се вели во изјавата на лидерите на ЕУ.

Европските лидери ги пофалија и „значајните напори“ што Украина ги покажа за пристапување на земјата во ЕУ.

– Европската унија со нетрпение очекува тесно да работи со Украина и да ја поддржи во нејзините напори целосно да ги исполни сите услови. Европскиот совет повторува дека иднината на Украина е во рамките на Европската унија, се подвлекува во заклучоците.

Украинскиот претседател, исто така, доцна синоќа се состана со својот полски колега Анджеј Дуда во Полска, на враќање во Киев од самитот на ЕУ, при што детално му го опиша патувањето и ситуацијата со војната во Украина.