Ковачевски: Средба со шефицата на ММФ Георгиева

На маргините на Минхенската безбедносна конференција, премиерот Димитар Ковачевски во саботата се сретна со директорката на Меѓународниот монетарен фонд Кристалина Георгиева и со претседателот на Европската банка за обнова и развој Одил Рено-Басо.

Според официјалното соопштение, премиерот Ковачевски му се заблагодарил на ММФ за признавањето на здравата економска основа на државата и нејзините стабилни економски политики.

Георгиева изрази одобрување за владините економски политики, како и за користење на линијата за претпазливост и ликвидност наменета само за земјите кои имаат здрава економија и здрави економски политики, се вели во соопштението. 

Ковачевски рече дека фискалната политика на државата е фокусирана на поддршка на граѓаните и економијата во услови на енергетска криза. Владата е решена да постигне одржлив економски развој, фискална консолидација и структурни реформи на среден рок, се додава во соопштението.