Во Хрватска отворена истрага откако протекоа во јавноста личните податоци на над 77.000 граѓани

Лични податоци на 77.317 граѓани протекоа во јавноста од хрватската агенција за наплата на долгови Б2 Капитал. Ова е најголемото истекување на лични податоци во Хрватска досега, објави порталот Индекс.

Од таа компанија излегоа податоци кои содржат име и презиме, матичен број, датум на раѓање, адреса на живеење, име и TIN на работодавачот, телефон/мобилен број, адреса на е-пошта, долг кон B2 Капитал, главнина и камата за задоцнето плаќање.

Агенциите за наплата на долгови, се потсетува во текстот, откупуваат лоши кредитни долгови од банки и телекомуникациски оператори и потоа сами Ð �и наплатуваат.

Оние чиј долг е продаден се жалат на постапувањето на тие агенции, но никој не може да им помогне бидејќи агенциите се формирани како трговски друштва, а не како кредитни институции. Б2 Капитал најмногу купуваше лоши кредити од банките.

Освен што ова е најголемото протекување на лични податоци во Хрватска досега и дека ќе треба да се утврди како овие податоци стигнале во јавноста, прашање е дали на таа агенција и било дозволено да ги обработува податоците на овој начин. Се поставува и прашањето како Б2 Капитал ги добил овие податоци, наведува порталот.

Од Агенцијата за заштита на податоците (АЗОП) за Индекс велат дека започнале истрага, а од Б2 Капитал за овој портал потврдиле дека имало неовластено отуѓување на приватните податоци на нивните должници и дека соработуваат со сите институции.