Индија останува најголемиот увозник на руска сурова нафта
Се очекува Индија да остане најголемиот увозник на руската сурова нафта од типот „Уралс“ во декември втор последователен месец, објави Ројтерс, повикувајќи се на податоци од глобалниот добавувач на финансиски податоци Refinitiva и трговците.
Во ноември индискиот пазар учествуваше со околу 53 отсто од вкупните испораки на танкери од оваа категорија, што е рекорд на сите времиња.
Уделот на Индија во извозот на руската сурова нафта и купените количини ќе се зголемуваат од месец во месец, и покрај пократкиот распоред на товарење за руските пристаништа, велат трговците.
Во декември учесниците на пазарот очекуваат уделот на Индија да достигне 70 отсто од вкупниот товар.
Индија, вториот по големина потрошувач на нафта во Азија, купува нафта „Уралс“ со голем попуст овој месец, според информирани извори. Земјата, наводно, плаќа на руската нафта далеку под лимитот од 60 долари за барел што го поставија ЕУ, земјите од Г7 и Австралија претходно овој месец.
Бројот на земји што купуваат руска нафта „Уралс“, една од најпопуларните сорти поради краткиот трговски циклус, евтината испорака и привлечните приноси на рафинериите, се прогнозира да се намали на само четири, според податоците на Рефинитив, цитирани од Ројтерс.
Индија земала најмалку два милиони тони од овој производ од почетокот на месецот. Се очекува Бугарија, која успеа да добие изземање од ЕУ, во декември да стане вториот најголем купувач на нафта „Уралс“ со испорака до 800.000 тони.
Испораките на сурова нафта „Уралс“ во Кина, наводно, ќе останат ниски со само една пратка од 140.000 тони испратена на 16 декември. Трговците, сепак, очекуваат до крајот на месецот повеќе „Уралс“ да биде извезена во Кина. Во меѓувреме, Турција, која годинава активно купува руска нафта, купи само една декемвриска пратка од 140.000 тони.
