Цените на нафтата паднаа по три недели раст
На светските пазари минатата недела цените на нафтата благо паднаа, по три недели раст, бидејќи поради високата инфлација каматните стапки на централната банка ќе останат покачени подолго од очекуваното, што ќе го забави растот на економиите, а со тоа и побарувачката за „црно злато“.
На лондонскиот пазар цената на барелот минатата недела се лизна за 0,7 отсто, на 93,27 долари, додека на американскиот пазар цената на барелот се намали за 0,8 отсто, на 90,03 долари. Откако пораснаа три недели по ред и достигнаа највисоки нивоа оваа година, цената на нафтата благо падна минатата недела.
Зголемување на каматните стапки на ФЕД
Ова е резултатот од пораката на американската централна банка. Додуша, челниците на ФЕД не ги зголемија дополнително каматните стапки на минатонеделната седница, но рекоа дека до крајот на годината би можеле да ги зголемат уште еднаш и да ги задржат на покачени нивоа подолго од очекуваното.
Таквото сценарио е најверојатно за другите централни банки на западните земји, бидејќи инфлацијата не се намалува толку брзо како што се надеваа инвеститорите и трговците. А тоа значи дека растот на економиите дополнително ќе се забави, што секако ќе ја ослаби побарувачката за „црното злато“.
„На краток рок, цените веројатно ќе се дефинираат главно со сигнали на страната на побарувачката“, оценуваат аналитичарите на Commerzbank во такво опкружување.
Намалено производство на нафта
Од друга страна, цените се поддржани од намаленото производство на Саудиска Арабија и Русија. Овие водечки извозници ќе ги намалат испораките до крајот на оваа година за вкупно 1,3 милиони барели дневно.
Организацијата на земјите извознички на нафта и нејзините сојузници, исто така, се согласија да го намалат производството. На овој начин овие земји се обидуваат да ги задржат зголемените цени на нафтата со оглед на тоа што побарувачката слабее поради забавувањето на растот на најголемите светски економии.
Минатата недела трговците беа изненадени од најавата на Русија дека привремено го забранува извозот на бензин и дизел за да обезбеди снабдување на домашниот пазар во време на жетва и да ги стабилизира цените. Москва не соопшти колку долго ќе биде во сила.
По минатонеделниот пад, цената на барелот на лондонскиот пазар поскапе за околу 9 отсто во однос на почетокот на годината, а на американскиот пазар за околу 12 отсто.
