Премиерот се извини за улогата на Холандија во трговијата со робови

Ропството било укинато во Суринам и другите територии кои ги држела Холандија во 1873 година.

Холандскиот премиер Марк Руте се извини во име на неговата влада за историската улога на Холандија во ропството и трговијата со робови, и покрај повиците да се одложи долгоочекуваната изјава.

„Денес се извинувам во име на владата, за постапките на холандската држава во минатото“, рече Руте во долгоочекуваниот говор за ропството во Националниот архив во Хаг. Говорот беше дочекан со молк од поканетите присутни, пишува АП и пренесува Бета.

Руте се извини во понеделникот, иако некои активистички групи го повикаа да почека до 1 јули следната година, годишнината од укинувањето на ропството во земјата.

Знаеме дека нема добро време за сè, нема соодветни зборови за сè, нема вистинско место за сè“, рече Руте.

Тој рече дека владата ќе формира фонд за иницијативи за да и помогне на земјата да се справи со наследството на ропството во Холандија и нејзините поранешни колонии.

Ропството беше официјално укинато во Суринам и другите територии што ги држеше Холандија на 1 јули 1863 година, но навистина беше укинато дури во 1873 година, по десетгодишен „транзициски“ период.

Злосторства против човештвото

Холандската влада претходно изрази длабоко жалење за историската улога на земјата во ропството, но не издаде официјално извинување. Руте претходно рече дека таквата изјава може да го поларизира општеството, но сега мнозинството во парламентот го поддржува извинувањето.

Говорот на премиерот е одговор на извештајот објавен минатата година од владиниот советодавен комитет. Препораките на комитетот вклучуваа извинување од владата и признавање дека трговијата со робови и ропството од 17 век до неговото укинување, што се случи директно или индиректно под холандска власт, претставува злосторство против човештвото.

Владата претходно изјави дека 2023 година ќе биде година на сеќавање на ропството кога земјата ќе размислува за својата болна историја и како таа историја игра негативна улога во животот на многумина денес.