Твитер не го признава Косово?! Мрежата ја отстрани поддршката за Косово и +383 броевите!

Меѓу поплаките кои деновиве кружат на платформата Твитер, една е особено изразена и привлекува внимание. Корисниците тврдат дека Твитер ја отстранил поддршката за +383 регионални шифри.

Во објавата напишана од корисникот Арменд Красниќ, може да се види следнава најава:

– Грешка. Не можеме да испратиме текстуална порака на овој телефонски број бидејќи операторот не е поддржан.

Арменд додаде дека „Твитер го отстрани Косово како земја или барем косовскиот префикс +383“.

Во коментарите, истиот корисник изјави:

– Пред ова можеше да го поставиш Косово како држава со префикс +383… но сега не можеш, нема Косово на списокот, ниту +383.

За да ги потврди овие тврдења, тимот на порталот „Смартлајф“ се обидел да се регистрира на платформата користејќи телефонски број со префикс +383, на кој Твитер требало да испрати шифра за потврда. Тие ја добиле истата порака како и другите корисници, а истата грешка се појави и кога ги пробаа броевите на сите други оператори со префикс +383.

Тие потврдија дека не е проблем со услугите за регистрација, пробувајќи ги и броевите +381, и секој пат кога Tвитер успешно ги пренесуваше на следниот чекор со известување дека е испратен код за верификација.

Иако Илон Маск веќе го спомна Косово кога се обидуваше да му предложи на светот решение за ставање крај на војната во Украина но, ниту тој, ниту самата платформа не ја објавија одлуката дали на корисниците на Косово им се забранува регистрација со телефонски број, па не е јасно дали ова е траен или привремен потег.

На самата платформа, Косово сè уште постои како предлог за тоа каде живеете, но, барем засега, нема можност да регистрирате број со префикс +383.