ЗАКЛУЧОК НА КОМИСИЈАТА – Шест клучни наоди од извештајот на 845 страници: Еве за што точно е обвинет Трамп

Истражниот комитет вели дека одлуката на Трамп лажно да прогласи победа на изборната ноќ во 2020 година била „предумисла“

Комитетот на Претставничкиот дом на американскиот Конгрес го прогласи за виновен поранешниот американски претседател Доналд Трамп за нападот врз Капитол.

Конгресниот совет, кој го истражува нападот врз зградата на американскиот Конгрес на 6 јануари минатата година, го објави својот конечен извештај на дури 845 страници.

Комисијата издвои шест клучни наоди. Треба да се издвои една точка, а тоа се однесува на ширењето на лажни тврдења од страна на Трамп, иако неговите соработници му кажаа дека се невистинити. Поранешниот претседател е виновен за заговор, се посочува во извештајот, бидејќи продолжил да изнесува неосновани обвинувања за изборни измами.

Истражниот комитет вели дека одлуката на Трамп лажно да прогласи победа на изборната ноќ во 2020 година била „предумисла“ и дека само неговиот адвокат Руди Џулијани ја поддржал акцијата.

Трамп изврши притисок врз тогашниот потпретседател Мајк Пенс да ги поништи изборните резултати и да го прогласи за претседател. Кога Пенс одби да го стори тоа, Трамп го нарече „слабич“ и го обвини дека „не е доволно цврст“.

Сето ова се случуваше додека бурна толпа упадна во Капитол, поттикната од запаливите изјави на Трамп. Вината за тој напад треба директно да ја преземе поранешниот претседател, според Комисијата, повикувајќи се на објавата на Трамп на Твитер објавена на 19 декември 2020 година.

„Голем протест во Вашингтон на 6 јануари. Бидете таму, ќе биде диво!“, напиша тогаш Трамп на Твитер.

Во сведочењето и судските документи, демонстрантите и членовите на екстремно десничарската милиција кои учествуваа во нападот на Капитол тој ден конкретно го наведоа твитот на Трамп како причина за доаѓањето во Вашингтон. Извештајот го цитира Роберт Морс, кој беше прогласен за виновен за напад на полицајци во американскиот Капитол. „Морс веруваше дека 6 јануари го претставува моментот кога „1776 година повторно ќе започне“, бидејќи претседателот Трамп побара од нив да бидат таму“, се вели во извештајот.

Кога започна нападот, Трамп ги игнорираше предупредувањата од Конгресот дека ситуацијата може да ескалира и не се обиде да ја смири вжештената атмосфера или да побара од демонстрантите да го напуштат Капитол.

„Еден човек е главната причина за немирите што избувнаа на 6 јануари – поранешниот претседател Доналд Трамп, кој го следеа многумина“, се наведува во резимето на извештајот.

Меѓу 11-те препораки предложени од комисијата е предлогот да му се забрани вршење јавна функција, што би го оддалечило Трамп од потенцијалната претседателска кандидатура на следните избори.

Во текот на 18 месеци, комитетот одржа 10 јавни расправи и интервјуираше повеќе од 1.000 сведоци, вклучително и службеници и персонал од администрацијата на Трамп, членови на семејството на Трамп, полицајци од Капитол, демонстранти, членови на милицијата и други. Комисијата ќе биде распуштена на 3 јануари, кога републиканците ќе ја преземат контролата над Претставничкиот дом.

Трамп одби да соработува со комисијата и конечниот извештај го нарече „лов на вештерки“.