Што толку им се брза? Општина Ѓорче Петров закажа вонредна седница на Совет во сабота да расправа за носење на спорен ДУП

Сабота наутро најчесто не е вообичаено време за да се свикува седница на Совет на општина, но сепак Советот на општина Ѓорче Петров закажа седница за утре ден сабота рано наутро во 10 часот.

Како што дознаваме, една од точките, ако не и единствена е носење на Детален урбанистички план за парцела во строгиот центар на населбата Ѓорче Петров според кој е предвидено изградба на дваесеткатници.

Конкретниот ДУП не наидува на одобрување од жителите на населбата, па затоа локалната власт се сетила да го носи за време на викенд, без претходна јавна најава, далеку од очите на јавноста очекувајќи дека целиот процес ќе мине без никакви реакции.

Последиците од овој ДУП ќе бидат далекусежни, а 24инфо.мк ќе изнесе дополнителни детали за штетноста на овој план, во текот на утрешниот ден.