(Видео) Каменуван автобусот на Форталеза, повредени шестмина фудбалери

Шест фудбалери на Форталеза завршија во болница поради повреди со кои се здобија при нападот на нивниот автобус на враќање од мечот со Спорт Ресифе.

Зад нападот стојат хулиганите на локалниот клуб кои неиспровоцирани го каменуваа автобусот со кој се рпевесуваше експедицијата на гостинската екипа.

На видеата кои се појавија по нападот може да се види искршено стакло од внатрешната страна на автобусот, но и крв на рацете и главите на некои играчи.

Повредени се фудбалерите Тити, Бритез, Жоао Рикардо, Саша, Дуду и Ескобар. Сите се префрлени во најблиската болница каде што добиле помош и ги санирале повредите.

Директорот на клубот Марсело Паз и претседателот Алекс Сантијаго беа цело време со повредените играчи, додека остатокот од тимот отиде во хотелот каде што беше сместен тимот во Ресифе.

„Ги удираа нашите играчи. Дуду крвари. Ова е апсурдно, ова не смее да му се случи на бразилскиот фудбал. Бесни сме”, напиша директорот на Форталеза.

Фудбалерот на Форталеза, Јаго објави фотографија од скршениот автобус.

„Кукавици! Пет играчи завршија во болница“, напиша тој покрај фотографијата.

Набргу по инцидентот, претседателот на Спорт Ресифе, Јури Ромао ги посети повредените фудбалери во болница за да им обезбеди се што им треба.