Медиумските агенции објавија дека ја повлекуваат фотографијата на Кејт Мидлтон објавена вчера

Светските медиумски агенции ја повлекоа првата официјална фотографија на Кејт Мидлтон објавена по нејзиното повеќемесечно отсуство од очите на јавноста. Причината е загриженоста дека фотографијата е „манипулирана“.

Асошиетед прес (АП), Ројтерс, Гети Имиџис и Франс прес (АФП) во неделата објавија известувања дека повеќе не користат фотографија од Кејт и нејзините три деца објавена од Кенсингтонската палата.

АП за Ал Џезира изјави дека фотографијата е повлечена бидејќи, по „поблиска проверка, се чини дека изворот манипулирал со сликата“ и дека фотографијата покажува „неконзистентност во порамнувањето на левата рака на ќерката на Кејт, принцезата Шарлот“. АФП рече дека сликата не може да се користи бидејќи е „променета“, а Ројтерс соопшти дека ја избришал сликата „по прегледот по објавувањето“.