Недостигот на лекови во Германија создава огромен притисок врз аптеките

„Ситуацијата е многу лоша во моментов, особено за децата, бидејќи тешко можеме да ги снабдиме со лекови“

Германија се соочува со недостиг на многу вообичаени лекови, што создава притисок врз аптеките и ги остава родителите низ целата земја во очајна состојба.

Агенција Анадолија (АА) разговараше со фармацевт од Берлин кој ситуацијата ја окарактеризира како многу сериозна и кој рече дека родителите се мачат да најдат лек за своите болни деца.

„Ситуацијата е многу лоша во моментов, особено за децата, бидејќи тешко можеме да ги снабдиме со лекови“, рече Џулијан Ваврзињак, додавајќи дека над 300 лека во моментов се недостапни.

„Постојат повеќе причини за ова, делумно поради војната во Украина, делумно поради проблемите со глобалниот синџир на снабдување, коронавирусот, високите цени на енергијата, трошоците за производство… производителите се соочуваат со големи предизвици“, рече тој.

Друг голем проблем е системот на одредување цени на лековите во Германија, бидејќи фондовите за јавно здравствено осигурување не плаќаат повеќе од законски утврдената цена за генеричките лекови.

Иако германската Влада неодамна најави приспособување на системот, Ваврзињак истакна дека нема промена во ситуацијата.

„Во спротивно, имам чувство дека ситуацијата може да се влоши бидејќи засега, дури ни сирупот за кашлица не е достапен“, посочи тој.

„Се надевам дека работите ќе се подобрат, се разбира, доколку политичарите преземат мерки, но тоа во моментов не го гледам. Се надевам дека работите ќе се подобрат можеби пред пролетта“, рече Ваврзињак.

– Аптеките го чувствуваат притисокот –

Според Германскиот федерален институт за лекови и медицински помагала (BfArM), лековите кои моментално се недостапни во земјата се антибиотиците, лековите за дијабетес, за канцер, лековите против висок крвен притисок и лековите против болки.

Главната причина за проблемите во снабдувањето е недостигот на испораки од земји како Кина и Индија, според Институтот.

Околу 80 отсто од лековите што се продаваат во земјата се генерички, произведени во земји како Кина и Индија. Во случајот со антибиотиците, на пример, генеричките имаат 100 отсто пазарен удел во Германија.

Ваврзињак за АА изјави дека недостигот на лекови ги стави аптеките под огромен притисок во последните недели.

„Разговараме со пациентите секој ден, мораме да им кажеме дека ги немаме овие лекови или дека не можеме да ги нарачаме“, објасни тој.

„За жал, мораме да ги вратиме со празни раце. Навистина е тажно, бидејќи станува збор за здравјето и благосостојбата на луѓето. Згора на тоа, не можеме да си ја работиме ни нашата работа, не можеме да им помогнеме со лековите“, додаде тој.

AA