ВИДЕО I Објавен првиот трејлер за „Џокер 2“ – сo авантурите на Феникс и Лејди Гага

Објавен е првиот трејлер за продолжението на филмот „Џокер“, во кој на Хоакин Феникс во насловната улога му се придружува Лејди Гага како Харли Квин.

Трејлерот за „Joker: Folie à Deux“ почнува со сцена во која Артур Флек од Феникс, познат како „Џокер“, затворен во озлогласената психијатриска болница Аркам. Додека поминува низ ходникот со лисици, вниманието му го привлекува Харли Квин, која вежба со болничкиот хор во една од собите.

-Јас сум никој. Не сум направила ништо со мојот живот како што направивте вие, се гледа како Харли Квин му кажува на Џокер подоцна во трејлерот.

Трејлерот продолжува со секвенци од заљубениот пар како шета по улица, избегнува експлозии, се бакнува и бега од толпата, придружени со легендарната љубовна песна на Берт Бакарек „What The World Needs Now“.

Во DC стриповите, Џокер и Харли Квин често се прикажуваат како романтична двојка, а Квин е претставена како негов терапевт во Аркам.

Деталите за тоа како режисерот Тод Филипс ќе ги претстави овие ликови во продолжението допрва треба да се објават, но врз основа на тоа како се справи со Џокер во хитот од 2019 година, слободно може да се каже дека „Folie“ ќе биде отстапување од она што го содржат стриповите.

Во филмот се појавуваат и Брендан Глисон, Кетрин Кинер и Зази Биц како Софи сосетката на Флек.

Првиот филм на Филипс за Џокер заработи 1 милијарда долари и освои два Оскари во 2020 година, вклучително и за најдобар актер за Феникс.