Во голем руски напад уништена една од најголемите електрани во Украина
Една од најголемите електрани во Украина е уништена во масовен руски ракетен напад, јави Скај њуз. Како што пренесува украински Интерфакс, повикувајќи се на висок функционер во електроиндустријата, целосно е уништена термоцентралата Трпилска.
Електраната се наоѓа недалеку од Киев, главниот град на Украина, и произведува околу 57 отсто од енергијата потребна за снабдување на регионот Киев со електрична енергија. Рускиот ракетен напад беше извршен рано утринава со ракети и беспилотни летала, а цел на руските сили беше украинската енергетска инфраструктура.
Centrenergo, компанијата која управува со термоцентралата, рече дека централата е „целосно онеспособена“, додавајќи дека нема смртни случаи меѓу работниците кои биле на смена за време на нападот.
Centrenergo оцени дека инцидентот е „црн ден“ во историјата на компанијата. Андреј Гота, претседател на Надзорниот одбор, рече: „Размерите на уништувањето се застрашувачки“.
Another video of the Tripolskaya Power Plant that was hit this morning in the Kiev region. #Ukraine pic.twitter.com/xNgaBqzmxq
— Maimunka News (@MaimunkaNews) April 11, 2024
Огромниот пожар го зафатил погонот за турбина, а соодветните служби се обидуваат да го локализираат пожарот, пренесува Интерфакс Украина.
Трафостаници и други електрани се оштетени во најмалку пет украински региони, а најмалку 200.000 луѓе во регионот Харков останаа без струја.
Руското Министерство за одбрана соопшти дека во текот на ноќта ги погодило објектите за нафта, гас и електрична енергија во „масовни напади“ во Украина. Москва соопшти дека користела прецизно оружје со долг дострел и беспилотни летала во нападите.
„Како резултат на тоа, работата на претпријатијата од украинската воена индустрија е нарушена, оневозможен е префрлање на резервите во борбени области и е отежнато снабдувањето со гориво на единиците и воените единици на вооружените сили на Украина“, се вели во соопштението на руското Министерство за одбрана.
