Авторска вечер и промоција на книга хаику поезија „Светот што лебди“ на црногорскиот поет Владан Лаловиќ
Пред многубројната публика во Музејот на македонската борба за самостојност во Скопје се одржа авторска вечер на црногорскиот поет, книжевник и сестран интектуален деец Владан Лаловиќ. Во рамките на авторската вечер беше промовирана и неговата книга хаику поезија „Светот што лебди“. Книгата е тројазична и содржи 120 хаику песни на црногорски, македонски и англиски јазик. Препевот е на проф. Даниела Штерјова.
Настанот го модерираше Катерина Митковска, претседател на Здружението на просветни работници на град Скопје, додека за ликот и богатото и разновидно творештво на авторот говореше проф. д-р Виолета Ачкоска. Таа во своето обраќање истакна: „Владан Лаловиќ е црногорски поет, есеист, публицист и научен работник, чија поезија има универзални и вонвременски дострели. Тој е вдаховен автор, кој трага по смисолот на човековото постоење во исконската борба за достигање на слобода и високи естетски вредности. Низ неговите песни се прелеваат акварелите на Бока Которска, на гордиот Ловќен, на мирисот на чемпресот, на грмотевиците и смирувањето, на копнежот за чистота, убавина, духовност, искреност, емпатија. Неговите стихови пленат со длабока промисленост и ја исполнуваат душата“.
На настанот свој настап имаше и музичкиот ансамбл „Вања Лазарова“ со сплет црногорски и македонски композиции.
Владан Лаловиќ го стекнал своето образование во Котор, Подгорица и Загреб. Магистрирал на Правниот факултет на Универзитетот на Црна Гора, а докторските студии по медиевистика ги посетувал на Филозофскиот факултет на Свеучилиштето во Загреб. Објавува голем на број на книги, научни трудови, поезија, есеи и написи во весници, часописи и портали за наука и култура од регионот и во странство. Уредник е и рецензент на голем број на научни трудови и литературни изданија. Неговата поезија е застапена во четири светски антологии, како и во повеќе антологии од регионот. Истата е преведувана на англиски, италијански, бугарски, турски и македонски јазик. Добитник е на меѓународни награди и посебни признанија кои се доделуваат во Италија, под покровителство на светскиот поетски директориум на UNESCO.
Објавувањето на книгата „Светот што лебди“ е подржано со средства од Секретаријатот за култура и спорт на Главен град Подгорица, врз основа на Одлука за суфинансирање на проекти од областа на културата за 2023 година.
