Протест во Сингелиќ поради прекин на струјата, од ЕВН велат дефектот е поради нелегални приклучувања

Група граѓани во знак на протест денеска ја блокираа улицата од Стајковци до Ченто поради прекин на електрична енергија.

Од ЕВН ја потврдија информацијата за 360 Степени, со образложение дека во селото Сингелиќ настанал дефект на среднонапонски кабел, како резултат на долгогодишните нелегални приклучувања и неконтролираното трошење на струјата.

„На оваа локација често има прекини во снабдувањето поради преоптоварување на мрежата. Екипите на Електродистрибуција ги санираат, но истите се повторуваат. Овој пат дефектот е посериозен и ќе одземе повеќе време од вообичаеното за санација“, се вели во реакцијата на ЕВН за 360 Степени.

На реконструкција и модернизирање на мрежата во Сингелиќ се работи повеќе од две години и иако поголем дел од проектот е реализиран, преостанати се над 100 објекти. За нив, од ЕВН велат, отежнато е работењето на вработените во Електродистрибуција.

„Токму во овие објекти живеат и работат жители кои им го отежнуваат секојдневното работење на вработените на Електродистрибуција, или пак целосно им забрануваат пристап во одредени клучни локации. Вработените често се соочуваат со вербални и физички напади“, велат од ЕВН.

The post Протест во Сингелиќ поради прекин на струјата, од ЕВН велат дефектот е поради нелегални приклучувања appeared first on 24info.mk.