Унгарија го победи Катар, си обезбеди место во четвртфиналето

Унгарија од втората позиција обезбеди пласман во четвртфиналето на Светското првенство во ракомет. Унгарците во последното коло го победија Катар со 29:23 (12:12).

Катарците беа тие кои беа подобри во првиот дел, неколку пати имаа предност од три гола, но Унгарците успеаја да обезбедат нерешен резултат на полувремето. Второто полувреме мина во доминација на Унгарците. Одиграа цврсто во одбраната, беа ефикаси во нападот и овој период го добија со шест гола разлика.

Имре со девет, односно Сита и Бока со по четири гола ја предводеа Унгарија.

Групата 2 уште пред ова коло ја освои Франција, Унгарија е втора, Холандија трета. Македонија доколку вечерва приреди сензација и ја победи Франција ќе заврши на третото место.

Пораз помал од девет гола разлика ќе ја остави Македонија на четвртото место и во конечниот пласман нашата репрезентација ќе биде пласирана од 9 до 12 место, а пораз поголем од девет разлика ќе ги смести „црвено-жолтите“ зад Австрија, односно во конечниот пласман ќе бидат пласирани од 13 до 16 место.