Слот: Не смеам да ви кажам што му реков на судијата

Англиската Премиер лига му забрани на тренерот на актуелниот лидер во лигата Ливерпул, Арне Слот (46) да го води тимот на наредните два натпревари.

Слот, во средата, по завршувањето на натпреварот со Евертон (2:2) доби црвен картон,
поради „агресивен, навредлив и погрден јазик“.

Холанѓанецот ќе ги пропушти натпреварите на ливерпул против Вулверхемптон и Астон Вила. Ова беше второ исклучување за Слот оваа сезона, тој исто така доби црвен картон против Фулам, а потоа беше казнет со казна од еден натпревар да раководи со тимот.

„Бев обземен од емоции. Сега посакувам да направев нешто поинаку. Не можам ни да ви кажам што кажав бидејќи истрагата е во тек. Мислам дека ремито беше праведно, но ние испуштивме два бода во последните моменти”, рече Слот кој не се појави на прес-конференцијата по натпреварот со Евертон.

Холандскиот тренер брилијантно го води Ливерпул оваа сезона. Тие се први во поредокот на англиската Премиер лига, а во Лигата на шампионите директно се пласираа во осминафиналето, исто така од челната позиција по завршувањето на првата фаза.