Вонредната контрола покажа дека емисиите се пониски од дозволените гранични вредности, а производниот процес се одвива според еколошките стандарди

Откако скопската градоначалничка Данела Арсовска денеска на прес-конференција информираше дека се извршени мерења на амбиенталниот воздух во „Цементарница УСЈЕ“ и дека се утврдени „огромни пречекорувања“ на дозволениот испуст на аерозагадувачи, и дека за тоа ќе биде започната кривична постапка, фабриката ги демантира наводите, отфрлајќи ги како неосновани ставовите изнесени во јавноста.

Наспроти Арсовска, од „УСЈЕ“ велат дека вонредната контрола што била спроведена од страна на Државниот инспекторат за животна средина на 3 и 4 јануари 2023 година, во присуство и на инспектори од Град Скопје, потврдила дека емисиите од производниот процес во „Цементарница УСЈЕ“ се пониски од дозволените гранични вредности, потенцирајќи дека производниот процес во фабриката се одвива во законски определените рамки и според еколошките стандарди.

„На прес-конференцијата без изнесени и податоци за мерења на 26 и 27 декември 2022 година. Вакви мерења во овие денови во кругот на фабриката воопшто не се направени, па оттука резултатите од нив не можат да се поврзат со УСЈЕ. Мерењата направени на 3 и 4 јануари 2023 од страна на ДИЖС и инспектори за животна средина на Град Скопје во кругот на ‘Цементарница УСЈЕ’, уште еднаш потврдуваат дека нема корелација помеѓу работата на цементарницата и квалитетот на амбиентниот воздух во градот. Резултатите од мерењата на сите емисини точки во процесот потврдуваат дека нема надминување, а концентрацијата на ПМ10 честичките во амбиентниот воздух измерена во ‘Цементарница УСЈЕ’ е дури и помала од други мерни места во градот“, истакнаа од „Цементарница УСЈЕ“.

Од фабриката, сепак, наведуваат дека поради енергетската криза и нарушеното снабдување со природен гас, за загревање на просториите се употребува мазут, што е дозволен енергенс согласно А-Интегрираната еколошка дозвола.

„При оваа вонредна контрола, кај парниот котел, кој не е дел од производниот процес и е исклучиво наменет за загревање на просториите, беше регистрирано отстапување кај еден параметар од мерењата. Компанијата веднаш ќе ги имплементира препораките на Инспекторатот и ќе направи замена на енергенсот со природен гас“, велат од УСЈЕ.

Тие потенцираат дека во цементарницата редовно се вршат независни мерења од страна на акредитирани лабаратории и дека „резултатите од досега извршените редовни мерења покажаа дека сите емисии, вклучувајќи ги и емисиите во котларата, се под законски дозволените граници. Последното вакво редовно независно мерење е направено на 28 отомври 2022 година“, наведоа од УСЈЕ.