Асен има нов крал, постариот брат Маркез

Возачот на Дукати, Марк Маркез, триумфираше на Големата награда на Холандија, 10-та трка од овогодинешното Мото ГП првенство.

Осумкратниот светски шампион успеа да израмни три победи по ред за прв пат од 2019 година, а во Асен го забележа својот шести триумф во сезоната, а 94-ти во кариерата. Тој се најде и на највисокото скалило на подиумот во најсилната класата по 68-ми пат, што го израмни со Џакомо Агостини, а пред двајцата сега е само Валентино Роси со 89.

Најблиску до постариот Маркез беше Марко Бецеки на Априлија, шест десетинки зад него, додека другиот возач на Дукати, Франческо Бањаја, беше на третото скалило на подиумот.

Покрај борбата на самиот врв, 10-та трка во сезоната беше обележана и со падот на помладиот Маркез Алекс, по дуелот со Педро Акоста, во кој возачот на Гресини ја скрши раката.