Никола Станишиќ од Македонија победи на „Ѕвездите на Гранд“, во финалето ја запеа „Ако утре ме нема“ од ДНК

Македонецот Никола Станишиќ е победник на регионалното музичко натпреварување „Ѕвездите на Гранд“ за 2025 година, освојувајќи ја титулата со најмногу гласови од публиката – дури 138.714. Големото финале започна во саботата вечер и траеше до раните утрински часови.

Во финалето учествуваа 20 кандидати, а Станишиќ триумфираше пред Елвис Мешиновиќ (второ место) и Зоран Ружиќ Ферари (трето место).



Станишиќ, роден во 2000 година, живее во Скопје и веќе настапува со свој бенд и надвор од Македонија. Особено внимание привлече со интерпретациите на македонски песни, кои ја воодушевија публиката и неговата менторка Цеца Ражнатовиќ. Таа јавно ја изрази својата наклонетост кон македонската музика, дури и заигра оро на сцената.

Во финалната вечер, Никола ја изведе песната „Ако утре ме нема“ од ДНК, која ја посвети на жртвите од трагичниот пожар во дискотеката „Пулс“ во Кочани.