ЛИТВАНЦИТЕ ОБЈАВИЈА: За експлозијата на гасоводот е виновен технички дефект, а не диверзија! Причина грешка во заварените спојки?!

Експлозијата на гасоводот на северот на Литванија, која предизвика евакуација на едно село, најверојатно е предизвикана од технички дефект, изјави денеска шефот на литванската компанија за транспорт на гас.

Во експлозијата што се случи синоќа, оштетен е гасоводот на компанијата Амбер Грид на северот на Литванија, но нема жртви, објави локалниот оператор на својот портал.

Во моментот на експлозијата пламенот се проширил на висина од 50 метри. Превентивно, од блиското село Валакелија беа евакуирани околу 250 лица.

Пожарот е изгаснат до полноќ, а жителите денеска се вратија во своите домови, а почнаа да се работи на санирање на оштетениот гасовод.

„Една од можните причини за експлозијата е тоа што е предизвикана од грешки во заварените споеви на гасоводот, но истрагата ќе ги даде сите одговори во следните неколку дена“, изјави Немунас Бикниус, шеф на АБ Амбер Грид Груп, операторот на литванскиот систем за пренос на природен гас.

Тој рече дека не верува дека експлозијата е резултат на каква било намерна активност и верува дека тоа е несреќен случај.

Гасоводот транспортира гас од литванското балтичко пристаниште Клаипеда до соседна Латвија.

Соседниот гасовод не е оштетен и продолжи да ги снабдува потрошувачите со гас во областа, соопшти групацијата Амбер Грид.

Литванија го прекина целиот увоз на руски гас во април 2022 година како одговор на руската инвазија на Украина. Земјата увезува гас од неколку земји преку терминалот за течен природен гас Клаипеда изграден пред една деценија. Тој терминал ги задоволува потребите на Литванија за природен гас и овозможува испорака до соседните земји.