Ѓорѓиевски расчистува со фантомските вработувања: 398 отпуштени од „Комуналец“, следат нови 100!

Новата градска администрација продолжува со ревизијата во јавните претпријатија под Град Скопје. Градоначалникот Орце Ѓорѓиевски денеска објави дека бројката на отпуштени вработени во ЈП „Комунална хигиена“ кои земале плата, а не доаѓале на работа, се искачила на 398 лица.

„Имало и работници и раководители. Убеден сум дека ќе дојдеме до бројка од 500 луѓе. Таква бројка да земале плата – тоа се најмалку 5 милиони евра од граѓаните годишно. За четири години тоа се 20 милиони евра. Во превод – тоа е Луна паркот што треба да го направиме, а го чекаат скопјани,“ изјави Ѓорѓиевски.

Градоначалникот најави дека ќе бара одговорност од сите лица кои потпишувале документи и одобрувале вакви вработувања, истакнувајќи дека сите имиња ќе бидат јавно објавени.

„Сите што земале плата, а не се појавувале на работа, ќе бидат јавно обелоденети. Такви случаи има не само во ‘Комунална хигиена’, туку и во ‘Паркови и зеленило’, како и во други јавни претпријатија, но не во толку голема бројка,“ рече градоначалникот.

Ѓорѓиевски потенцираше дека бркањата од работа се законски и дека нема да има толеранција за злоупотреби на јавни ресурси.

Дополнително, тој укажа и на хаосот во другите јавни претпријатија: „Додека половина Скопје нема вода за пиење, во ‘Водовод и канализација’ има четири магацини полни со материјали. Некој тоа свесно и намерно го правел,“ рече Ѓорѓиевски, додавајќи дека следува целосна ревизија на работењето на сите градски претпријатија.