Руски воен експерт: “Доаѓањето на Герасимов значи дека можеме да го искористиме целиот арсенал во Украина, дури и нуклеарното оружје”

Назначувањето на Герасимов ја зголемува можноста Русија да употреби нуклеарно оружје на бојното поле во Украина

Руското Министерство за одбрана го назначи началникот на Генералштабот на руската армија Валериј Герасимов (67) за командант на руските сили во Украина, што е најзначајна во низата промени во највисоките ешалони на руската војска.

Критика

Голем број националистички воени блогери, кои се „лиценцирани“ од Кремљ да го критикуваат водењето на војната, го обвинија Герасимов за неуспехот на руската војска во војната против Украина.

Евгениј Пригожин, основач на платеничката група Вагнер, и чеченскиот водач Рамзан Кадиров, не премногу тајно го критикуваа Герасимов, тврдејќи дека нивните наводно супериорни и полуавтономни сили се одговорни за успесите.

Поддржувачите на Министерството за одбрана велат дека Русија често има лошо досие на почетокот на војните и дека многу од нејзините проблеми со снабдувањето, технологијата и синџирот на команда се решени во изминатите десет месеци или се во процес на решавање.

Промени

Министерството за одбрана соопшти дека позицијата командант задолжен за „специјалната воена операција“ го одразува проширувањето на нејзиниот опсег и потребата од подобрување на организацијата и командата.

Заменици на Герасимов ќе бидат армискиот генерал Сергеј Суровикин, наречен „Генерал Армагедон“, кој беше именуван за врховен командант на руските сили во Украина пред само три месеци, армискиот генерал Олег Саљуков и заменик-началникот на Генералштабот, генерал-полковник Алексеј Ким.

Игор Коротченко, воен стручњак-јастреб кој е чест гостин на државната телевизија, рече дека до кадровската промена дошло затоа што Украина добила тешко вооружување со долг дострел од Запад, а можно е наскоро да добијат тенкови и оклопни возила.

Тој посочи дека со назначувањето на Герасимов се зголемува можноста Русија да употреби нуклеарно оружје на бојното поле во Украина.

„Назначувањето на Герасимов значи дека може да се користат сите средства за уништување во арсеналот на вооружените сили на Руската Федерација – без исклучок.

Политичка порака

Со назначувањето на Герасимов, Путин можеби испраќа порака до Западот за неговата решеност да победи во војната и да ја зајакне позицијата на војската во однос на воените формации на Пригожин и Кадиров.

Тој, исто така, сака да го направи својот врховен командант поодговорен за секојдневното одвивање на инвазијата.

„Сега Генералштабот е директно и бескомпромисно одговорен за апсолутно сè“, рече Семјон Пегов, руски воен блогер кој го носи прекарот Варгонзо.

„Генералот Армагедон сè уште е во центарот на одлучувањето, но во помалку ранлива позиција“, додаде тој.

Татјана Становаја, основачот на Р.Политик, смета дека малку ќе се промени.

„Герасимов доби команда на воената операција поради сериозните неуспеси на Суровикин“, рече таа.

Кој е Герасимов?

Путин го назначи Герасимов за шеф на Генералштабот и заменик-министер за одбрана на 9 ноември 2012 година, три дена откако го назначи долгогодишниот соработник Сергеј Шојгу за министер за одбрана.

Секој од нив држи една од трите нуклеарни актовки со кои може да нареди руски нуклеарен напад.

Герасимов одигра клучна улога во руското преземање на Крим од Украина во 2014 година и во обезбедувањето воена поддршка на сирискиот претседател Башар Ал Асад.

Стејт департментот го санкционираше ден по инвазијата на Украина, велејќи дека тој е меѓу тројцата руски функционери, заедно со Владимир Путин, директно одговорни за војната.

Сепак, Герасимов понекогаш разговара со генералот на американската армија Марк Мили, Здружениот началник на Генералштабот на американската армија.