Медведев: Поразот на Русија би можел да доведе до нуклеарна војна

Дмитриј Медведев, поранешен претседател на Русија и заменик шефот на рускиот Совет за безбедност изјави дека „поразот на нуклеарната сила во конвенционална војна може да предизвика нуклеарна војна“.

Дмитриј Медведев, поранешен претседател на Русија и заменик-шеф на рускиот Совет за безбедност, во четвртокот предупреди на нуклеарна војна во случај на пораз на Русија во војната против Украина.

Коментирајќи ја претстојната средба на западните и украинските претставници во воената база Рамштајн во Германија, Медведев на Телеграм објави дека очекува на состанокот да се разговара за нови испораки на тешко оружје и ударни системи.

Тој додаде дека никој не размислувал за изведување на „елементарниот заклучок дека пораз на нуклеарна сила во конвенционална војна може да предизвика нуклеарна војна“.

„Нуклеарните сили не ги загубиле големите судири од кои зависи нивната судбина. И тоа на сите би требало да им биде очигледно“, рече Медведев.

Рускиот претседател Владимир Путин во декември минатата година изјави дека руската воена доктрина дозволува само одбранбена употреба на нуклеарно оружје како одговор на надворешен напад.

Претходно Медведев, познат по своите гласни и воинствени изјави во јавноста, изјави дека Москва може да користи нуклеарно оружје за самоодбрана.