Европскиот парламент се залага за формирање специјален суд кој ќе ѝ суди на Русија за војната во Украина

За усвојување на резолуцијата гласаа 472 европски парламентарци, 19 беа против, а 33 беа воздржани.

Европскиот парламент усвои резолуција со која се предлага формирање специјален суд за руските политички и воени лидери за злосторства на агресија против Украина.

За усвојување на резолуцијата гласаа 472 европски парламентарци, 19 беа против, а 33 беа воздржани.

Резолуцијата ја повикува Европската Унија тесно да соработува со Украина и меѓународната заедница за да го поттикне создавањето специјален меѓународен суд за кривично гонење на руското политичко и воено раководство и неговите сојузници.

Европскиот парламент објави дека специјалниот суд мора да има надлежност за истрага против рускиот претседател Владимир Путин и неговиот белоруски колега Александар Лукашенко.

„Деталите за специјалниот суд допрва треба да се утврдат, а Европската Унија треба веднаш да започне подготвителна работа и да се фокусира на изградба на аранжмани за судот во соработка со Украина“, се вели во соопштението.

Исто така, беше констатирано дека Парламентот цврсто верува дека формирањето специјален суд ќе испрати многу јасен сигнал и до руското општество и до меѓународната заедница дека Путин и генерално руското раководство може да бидат осудени за кривично дело агресија во Украина.