Панини албумот за Мундијал 2026 станува најскап досега – 980 сликички и до 1000 фунти за комплетирање

За многу генерации фудбалски навивачи, малку работи го носат истиот вид возбуда како моментот кога се отвора ново пакетче сликички и првпат се „фаќа“ некоја легенда: Зико, Франц Бекенбауер, Диего Марадона или Лионел Меси. Тој мал ритуал одамна е дел од фудбалската култура.

Сè започна во 1970 година, кога италијанската компанија „Панини“ ја лансираше првата официјална колекција за Светското првенство во Мексико. Од тогаш, собирањето албуми прерасна во глобална опсесија, а размената на дупликати стана речиси задолжителен дел од фудбалското детство ширум светот.

Но, новото Светско првенство во САД, Канада и Мексико носи сосема нова димензија. Со проширувањето на турнирот на 48 репрезентации, и албумот станува најголем досега: 112 страници исполнети со дури 980 уникатни сликички, меѓу кои 68 специјални изданија. Колекцијата ќе биде достапна веќе од утре, но задачата да се комплетира е сè освен едноставна.

И финансискиот предизвик е сериозен. Во Велика Британија, едно пакетче со седум сликички чини 1,25 фунти (околу 1,44 евра). Во идеален, речиси невозможен сценарио без ниту еден дупликат, на собирачот би му биле потребни најмалку 140 пакетчиња, што изнесува околу 175 фунти (околу 201 евро).

Реалноста, сепак, е многу посурова. Статистиката покажува дека за целосно пополнување на албумот често се потребни над 1000 пакетчиња, што ја крева конечната сметка на приближно 1000 фунти, односно околу 1.153 евра.