Веднаш по острите реакции на јавноста и од страна на невладини организации за интервјуто на Јутјуберот Стефан Лазаров со Драган Павловиќ-Латас, МВР презело мерки за да се одреди дали има основ за понатамошно постапување.
Секторот за компјутерски криминал од МВР доставил известување до скопското обвинителство по интервјуто емитувано на 15 февруари, во кое Латас раскажува како на 15-годишна возраст, тој и неколку другари злоставувале девојка која претходно била „шамарана“.
Во интервјуто во еден дел Латас, раскажувајќи за своето прво сексуално искуство кажува дека бил повикан од познаник кој му рекол да „влезе во фичото и да работи“ додека внатре имало „распарталена жена“. Претходно Латас го опишува пријателот како син на полициски моќник во тоа време, кој сакал сите девојки пред сексуалниот чин да ги „шамара“.
„До Основното јавно обвинителство Скопје доставено е известување од Секторот за компјутерски криминал при МВР за настанот. Надлежен јавен обвинител ќе даде насоки за натамошни дејствија и проверки“, велат од Обвинителството за А1он.
Интервјуто предизвика лавина коментари и осуди во јавноста, при што имаше повици до Обвинителството да постапи.