Добар одмор во текот на ноќта може да ви го продолжи животот за пет години

Добрите навики за спиење можат да го продолжат животот на луѓето до пет години, покажа американско истражување објавено денес.

Како што објави британски Телеграф, студијата спроведена од 2013 до 2018 година, врз основа на повеќе од 170.000 луѓе, со просечна возраст од 50 години кои живеат во САД, покажа дека оние кои имаат пет фактори на здрав сон имаат помала веројатност да умрат предвреме.

Резултатите од студијата беа презентирани денеска на годишната научна сесија на Американскиот колеџ за кардиологија со Светскиот конгрес за кардиологија.

Петте фактори на здрав сон вклучуваат дека испитаниците спиеле помеѓу седум и осум часа навечер, имале потешкотии да заспијат не повеќе од два пати неделно, имале проблеми со спиењето не повеќе од двапати неделно, не користеле апчиња за спиење и се чувствувале одморени по будењето најмалку пет дена во неделата.

Кај мажите и жените кои ги имале сите пет фактори за квалитетен сон, очекуваниот животен век бил 4,7 години подолг за мажите и 2,4 години подолго за жените во споредба со оние кои немале ниту еден или само еден фактор.

„Ако луѓето ги имаат сите овие идеални навики за спиење, тие имаат поголема веројатност да живеат подолго“, вели д-р Френк Кијан, клинички соработник на Медицинскиот факултет Харвард и коавтор на студијата.

Кијан истакна дека подобрувањето на спиењето во целина, за кое е особено важно да се идентификуваат нарушувањата на спиењето, може да спречи дел од прераната смртност. Кијан истакна дека е важно помладите луѓе да разберат дека многу негативни однесувања се акумулираат за да му наштетат на здравјето со текот на времето, и затоа треба почесто да се разговара за спиењето и да се процени неговиот квалитет.

Студијата исто така покажа дека квалитетот на сонот е поважен од должината на спиењето. Истражувачите заклучија дека осум проценти од смртните случаи може да се припишат на лошите обрасци на спиење по следење нешто повеќе од четири години, за време на кои умреле 8.681 лице, вклучувајќи 2.610 смртни случаи од кардиоваскуларни болести и 2.052 од рак.

По земање предвид на други фактори за кои е познато дека го зголемуваат ризикот од прерана смрт, како што се претходно дијагностицирани медицински состојби и консумирање алкохол, луѓето кои ги имале сите пет фактори на здрав сон имале 30 проценти помали шанси да умрат од оние кои немале ниеден или само еден фактор. Тие имале 21 отсто помала веројатност да умрат конкретно од кардиоваскуларни болести, а 19 отсто помали шанси да умрат од рак.